Nun apueste de la Conceyalía de Cultura y Mocedá del Conceyu de Ribeseya por promocionar la cultura asturiana

nel nuesu conceyu, llegóse a un alcuerdu de collaboración cola Banda Gaites Ribeseya”. El conveniu roblóse’l miércoles 22 d’avientu, nel Salón de Plenos del Conceyu de Ribeseya.

Conocedores de la intención de la Banda de Gaites Ribeseya d’alquirir paxeyos tradicionales ya instrumentación pretende collaborase económicamente pa poder contribuyir a qu’el so proyectu seya una realidá. Ye una inversión en cultura que tien que ser ún de los principios fundamentales de tou gobiernu municipal.

Al marxe de lo puramente económico y material, l’oxetivu pasa por tener un compromisu cola cultura y cola música fecha nel nuesu conceyu, y nesti casu en particular cola cultura asturiana.

Dos miembros de la nuesa banda compiten el día 23 d’Ochobre nel World Solo Drumming Championships, Campeonatu del Mundu de Tamboriteros Solistes, que se celebra na Glasgow Caledonia University. Diego Purón compitiendo’l númberu 62 d’adultos como miembru de The House of Edgar Shotts and Dykehead Pipe Band, banda de primer grau, y Pelayo Garcia compitiendo’l númberu 13 d’adultos como miembru de Strathclyde Fire & Rescue Pipe Band, banda de segundu grau.

Más información: Llista de participantes y Noticia en LNE.

Andrea Joglar convirtióse esti sábadu 7 d’Agostu de 2010 na primer muyer que gana’l troféu pa solistes de gaita asturiana y gallega del Festival Intercélticu de Lorient, que lleva dende va unos años el nome de
McCrimmon y qu’enantes yera conocíu como Macallan. Andrea consiguió la victoria nuna dura competición col veteranu Rubén Alba (ganador del títulu n’ediciones anteriores), que demostró una perfección téunica
inigualable, pero la espontaneidá que xune la gaitera asturiana a la so induldable calidá téunica inclinó la balanza del xuráu de la so parte, per delantre tamién del so hermanu Rodrigo Joglar que quedó clasificáu en tercer llugar.

Como yera d’esperar, Asturies algamo’l Troféu McCrimmon de 2010 de la mano d’Andrea Joglar, que cuayo una actuación bien bona, a pesar de la so mocedá, lo que nun-y torga tener una calidá como fai tiempu que nun s’oyía en Lorient.

El segundu llugar algamólu Rubén Alba, que se vio perxudicáu como otros años pasaos pol formatu del xuráu del concursu, lo que nun-y quita méritu a Andrea. Y el tercer puestu foi pal hermanu de la ganadora, Rodrigo Joglar. En cuartu llugar quedó clasificáu Pablo Dalama, mentanto que la quinta posición foi pal asturianu Jesús Fernández. Nos puestos restantes clasificáronse los siguiente gaiteros nesti orde: Jesús Sánchez, sestu, Raúl Lacilla, séptimu, y Blas García, octavu.

Video de l’actuación d’Andrea:

Fuente: Asturnews

El sábadu 26 de xunu celébrose en Annan (Escocia) el Campeonatu Británicu de Bandes de Gaites, segunda gran cita del añu, nel que Field Marshall Montgomery algamó’l so trunfu nun día asoleyáu y con calor. Los seyes primeros clasificaos fueron los mesmos que nel pasáu Campeonatu d’Escocia, alteriando un plizcu l’orde.

Grau 1

1.- Field Marshall Montgomery
2.- Boghall&Bathgate
3.- St Laurence O’Toole
4.- Scottish Power
5.- House of Edgar-Shotts&Dykehead
6.-Strathclyde Police

Percusión: Boghall&Bathgate.

Felicitaciones dende equí a los ganadores y deseyamos que llegue’l próximu campeonatu que sedrá’l Campeonatu d’Europa y celebrárase’l día 31 de xunetu.

Videu de l’actuación de Boghall&Bathgate:

Fuente: Diego Puron/Pipes|Drums

El Conceyu Cultural Curriverás col enfotu de sofitar a les nueves xeneraciones de gaiteros convoca el primer Trofeu Curriverás de Gaiteros/es Mozos/es que tendrá llugar nel pueblu llangreanu de barros les caberes selmanes d’agostu, con fase eliminatoria si el númeru de participantes ye grande y fase final que sedrá el día 29 d’agostu de 2010.

Puen consultase les bases nel blogue cuartetucurriveras.blogspot.com y el plazu d’inscripción va tar abiertu fasta’l 9 d’agostu de 2010.

Fuente: C.C Curriverás

Premier Music International d’Inglaterra sacó una nueva llinia de caxes pa banda de gaites, incluyendo bombu y timbales, y una gama de baquetes en tres peso distintes.

La compañía tamién anunció que la banda de grau 1 Fife Constabulary Pipe Band, d’Escocia, va utilizar estos preseos baxo un alcuerdu de patrociniu. La banda va tocar cola llinia completa de productos Premier.

L’anunciu de los nuevos productos llega dempués de que la compañía sufriera una fuerte reestructuración y una separación de Craig Colquhoun de Tiverton, Ontario (Canada), diseñador y dueñu de la patente Hosbilt (timbales y bombu). Colquhoun atópase trabayando nuna nueva serie rediseñada de bombu y timbales, fabricaos pola so propia compañía.

Premier agora ufierta’l so HTS800 con un acabáu, “Cromáu Diamante”. La compañía afirma que los sos tambores ufierten “un acabáu brillosu ensin rival combináu con una durabilidá estrema.”

Premier añedió tamién trés nuevos modelo de baquetes, lo que significa la torna de la marca a esti mercáu. Les baquetes “Premier Etiqueta Negra”, tán feches de pládanu con un cuerpu allargáu y una cabeza ovalada. “Premier Etiqueta Colorada” tán fechos tamién de pládanu pero más delgaes y más llixeres, y descríbenles como más áxiles, ente que “Premier Etiqueta Blanca” tán feches de nozal y tán empobinaes a caxistes que busquen un soníu “más completu con un ataque añedíu”.

La nueva gama “Revolution” de bombu y timbales usa la teunoloxía TDT de la compañía, con un pesu más amenorgáu y un mínimu contautu de los tensores tratando de consiguir el “mínimu contautu col cascu y una gran resonancia, dexando al cascu falar con claridá”. Los nuevos timbales “Revolution” fabríquense en 5 tamaños, ente que los bombos vienen en 3 tamaños. La compañía amestó un timbal de 24×14” y un bombu de 30×16”.

La nueva gama “Revolution” nun reemplaza a nenguna otra gama, y forma una gama amás de la Serie Profesional, incluyendo los nuevos tamaños que se vienen amestar a esta última serie.

Sven Paris de Premier, diz que los nuevos productos pa banda de gaites de la so compañía, yá tán siendo unviaos a los distribuidores y deberíen de tar a la vienta bien llueu. Tamién añedió que la marca llanzaáa una nueva web aína.

Field Marshall Montgomery y St Laurence O’Toole tamién usen Premier baxu alcuerdos de patrociniu.

Fuente: Pipes|Drums

Dientro de les xeres programaes pal Festival Intercélticu d’Avilés, entamáu pola Asociación Cultural Esbardu, atópase como novedá’l Memorial Pepe González, que naz empobináu a la participación de nuevos valores de la gaita, siendo l’únicu requisitu nacer dempués del añu 1996, y tando abiertu’l plazu d’inscripción hasta 15 participantes, quedando les
solicitúes recibíes dempués nuna llista de reserves pa cubrir posibles baxes.

Los concursantes tendrán d’interpretar dos temes de llibre eleición, almitiéndose composiciones propies. El fallu del xuráu publicaráse esi mesmu día a la fin del concursu y sera inapelable, siendo’l plazu pa formalizar la inscripción hasta’l día 15 de xunetu. Tolos participantes van recibir un premiu y un diploma pola so participación, afitándose tres premios especiales pa los tres primeros clasificaos que consisten nuna gaita fabricada pol luthier Miguel Alonso de Colunga pal ganador y 60 y 30 euros respectivamente pa segundu y tercer clasificáu.

Bases completes equí (descarga en pdf).

Fonte: Alicia Pais Varela

El pasáu domingu remató la XVIII edición del Concursu y Amuesa de Folklore “Ciudad d’Uviéu”, saliendo güei publicada en “La Nueva España” la llista completa de ganadores. Na categoria más rellacionada cola xera de la nuesa banda, la de gaiteros solistes ganó Rubén Alba, gaiteru avilesín, ganador del prestixosos troféu Macallan en dos vegaes y que como premiu pola victoria n’Uviéu va poder tratar de revalidar, curiáu que nesta edición los cuatro primeros clasificaos van ser los cuatro gaiteros que representen a Asturies nel Festival Interceltique de Lorient y enfréntense a gaiteros gallegos y bretones pol prestixosu troféu McCrimmon (antiguu troféu Macallan). Dende equí felicitar al nuesu amigu Rubén Alba y a los otros trés clasificaos, Jesús Fernández González, Andrea Fernández Joglar y Rodrigo Fernández Joglar.

Nel restu de categoríes nun hebo munches sorpreses, ganando en tonada masculina’l llaniscu Celestino Rozada, llogrando asina’l so tercer títulu consecutivu, y en tonada femenina Marisa Valle Roso, que suma so cuartu títulu. Na categoría de coros ganó l’agrupación piloñesa “Ars Nova”, en pareyes de baille, repite trunfu Dario Alvarez, anque con distinta pareya que l’añu pasáu, anguaño fíxolo con Patricia Pereira, y por rematar na categoría d’acordión diatónicu, categoría que s’estrenaba anguaño, llogró’l trunfu Marcos García Alonso.

La nuesa más sincera felicitación a tolos ganadores.

Fuente: Diego Purón/LNE

El plazu pa la inscripción nel concursu de Gaita de Xixón, que va tener llugar nel branu, demientres los díes 20 y 21 de xunetu nel Tendayu del Pueblu d’Asturies (en fase eliminatoria) y el 4 y 5 d’agostu na Plaza Mayor del Conceyu de Xixón (na so fase final), atópase yá abiertu y remata a les 14:00 hores del día 9 xunetu, pudiendo presentase toes aquelles persones que lo deseen y seyan menores de dieciséis años en categoría infantil, y ensin llende d’edá pa la categoría d’adultos, modalidá de gaita y tambor y pareyes.

La inscripción va poder formalizase de dos maneres: Per corréu postal, unviando’l boletín d’inscripción debidamente rellenáu a:

Departamentu de Festexos del Teatru Xovellanos de Xixón, Cai Cabrales, 82 – 33201 – Xixón

O per corréu lletrónicu, a la dirección festejos@teatrojovellanos.com, apurriendo tolos datos personales que figuren nel boletín citáu, que pue descarga nel enllaza qu’ufrimos n’Asturnews.

Bases completes de la edición del VIII Concursu

Fuente: Asturnews

Casi un añu dempués del llanzamientu de la so Caxa de fibra de carbonu nos Xuegos Indoor de Toronto nel 2009, l’inventor Terry Cleland de Downsview, Ontario, sacó una gama de bombos y timbales que completen la gama de productos. La banda de Cleland, 400 Squadron que compiten en Grade 3 y de la qu’elli mesmu ye’l Pipe Major (Direutor), compitió con prototipos d’estos nuevos tambores nos xuegos indoor de Toronto d’esti mesmu añu.

Mentanto que’l preciu final entá se publicó, Cleland diz qu’un bombu de 28”x16” vendría costando aprosimao unos 1890€. Los timbales, dependiendo del tamañu, taríen alredor de los 1260€. Tamién comentar que la so compañía puede unviar los bombos colos logos de la banda predibuxaos nos parches, como un extra opcional.

“Apurrimos una rempuesta a los intereses de delles bandes de Norte América y Europa” dixo Cleland. “El conxuntu perfectu ente caxes, timbales y bombu ye lo que de verdá busquen les bandes. Los tambores nun son solu estremaos n’aspeutu; tienen un soníu más ricu y fondu qu’otros tambores”.

Cuando se-y entruga sobro l’escepcional preciu de los sos productos, Cleland diz, “Sabemos que los nuesos tambores son una gran inversión. Ye importante dase cuenta que la fibra de carbonu enllarga la vida del to tambor abondo y la cualidá del soníu ta n’otra lliga”.

Según Cleland los nuevos tambores inclúin aros de fibra de carbonu ya incorporen tamién un efectivu sistema de tensión de parches. Elli caltien que los aros de carbonu son “los primeros de la so clase nel mundu de los tambores” y afirma que tienen “una terrieza que facilita una repartida mas equitativo de la tensión nos cantos de los parches y poro una tensión mas partida nel parche”. La construcción integra en carbonu, diz, implica que los tambores son “inmunes a los cambeos ambientales”.

El pesu de los nuevos preseos ye claramente menor qu’el de los sos competidores direutos. El bombu de 28”x16” pesa unos 5 kg, ente que un timbal pesa menos de 4 kg. “Esto significa qu’el nuesu bombu al par de ún de los nuesos timbales pesa lo mesmo que solo un bombu de los nuesos competidores”, apunta.

Dende’l llanzamientu de les sos caxes, Cleland diz que sólo la so banda les usa como cuerpu de percusión, pero diz qu’hai una resistencia del mercáu pola falta d’una gama completa de productos. Comentar que yá tien una llista de pidíos pa dellos bombos.